Shqiptarët mundin sërish Serbinë, këtë radhë në Kupën e Botës.
Bëhet fjalë për shqiptarët e Zvicrës, të cilët pasi ndalën Brazilin pak ditë më parë, kanë mundur me rezultatin 1-2 Serbinë.
Gjithçka ka ndodhur në pjesën e dytë, ku protagonistë janë bërë Granit Xhaka dhe Xherdan Shaqiri, të cilët kanë përmbysur golin e serbit Mitroviç.
Fillimisht ka qenë mesfushori i cili ka shënuar një super gol në minutën e 52’të duke barazuar rezultatin. Dhe sikur të mos mjaftonte goli, Xhaka ka festuar me simbolin e shqiponjës, duke përcjellë kështu një tjetër mesazh nga futbollisti me origjinë kosovare.
Ndërsa kur dukej se ndeshja do të mbyllej në barazim, Xherdan Shaqiri i ka dhënë epërsinë kombëtares helvete, duke vulosur kështu përfundimisht një “fitore shqiptarësh”.
Festa e dy shqiptarëve ishte tipike shqiptare, me simbolin e shqiponjës.
Me këtë fitore Zvicra ngjitet në kuotën e 4 pikëve, po aq sa Brazili, duke parakaluar kështu Serbinë me 3 pikë. Ndërsa vendin e fundit në grup e mban Kosta Rika me 0 pikë.
